Гаухардын ийгилик баяны: «Бизнесте мүнөз, тажрыйба жана алдыга умтулуу эң маанилүү»

Гаухар Жалал-Абад облусунун Майлуу-Суу шаарынан. Жалал-Абадда билим алып, бүгүнкү күндө Ош шаарында жашап, өз бизнесин ийгиликтүү өнүктүрүүдө. Соода тармагында эмгектенген жолдошу менен бирге төрт баланы — үч кыз жана бир уулду тарбиялап келишет.

Гаухар «Финансы жана кредит» адистиги боюнча билим алып, эмгек жолун банк тармагында баштаган. Бирок жарым жылдан кийин бул багыт өзүнө ылайык келбей турганын түшүнгөн. Ал адамдар менен көбүрөөк баарлашкан, чыгармачылыкка жана тынымсыз өнүгүүгө мүмкүнчүлүк берген, эмгегинин жыйынтыгын дароо көрө алган ишти каалаган. Ошентип, соода тармагына келген.

Бул тармакта ал жолдошунун агасы менен он жылдай иштеген. Дал ошол киши аны эмерек бизнесине алып келип, иштин негиздерин үйрөткөн: кардарлар жана жеткирүүчүлөр менен иштөөнү, сүйлөшүүлөрдү жүргүзүүнү, талапты туура коюуну жана өз кызыкчылыгын ишенимдүү коргоону көрсөткөн.

Убакыттын өтүшү менен жолдошунун агасы эмерек дүкөнүн жаап, бул тармактан кетүүнү чечкен. Ошондо Гаухар дүкөндү өзүнө өткөрүп берүүнү өтүнгөн. Ошентип анын өз алдынча бизнес жолу башталган.

Дүкөн мурда эле иштеп турганына карабастан, Гаухар дээрлик баарын кайрадан баштоого туура келген. Товар аз болгон, туруктуу жүгүртүү али калыптана элек болчу, ал эми эмеректердин негизги бөлүгүн кайра сатып алуу зарыл эле. Алгачкы мезгил оңой болгон эмес: сатууну көбөйтүү, кардарларды табуу, милдеттенмелерди аткаруу жана ошол эле учурда бизнести өнүктүрүүгө инвестиция салуу керек болгон.

Ошол учурда анын маанилүү чечимдеринин бири каржылоо тартуу болгон. Ассортиментти кеңейтүү жана жүгүртүү каражаттарын көбөйтүү үчүн Гаухар FINCA Банкка кайрылган. Ал үчүн насыя жөн гана карыз эмес, бизнести алдыга жылдыруучу курал болгон: товар сатып алууга, кардарларга көбүрөөк тандоо сунуштоого жана дүкөндүн позициясын акырындык менен бекемдөөгө жардам берген.

Кийинчерээк ал бизнести дагы да өнүктүрүү үчүн ири суммадагы кийинки насыясын алган. Ал убакта Гаухар соода тармагында жетиштүү тажрыйба топтоп, насыя каражаттарын туура пайдаланууну жана насыяны так максат менен алуу канчалык маанилүү экенин жакшы түшүнгөн.

«Эгер акча жүгүртүүдө болуп, киреше алып келип, пайыздарын кандайча төлөй турганыңды так билсең, анда насыя бизнести өнүктүрүүгө чоң жардам берет», — дейт ал.

Бүгүнкү күндө Гаухар Ош шаарындагы Lubi Dom эмерек салонун өнүктүрүп келет. Салон «Таатан» соода борборунда жайгашкан. Ассортимент жана бизнес тууралуу маалыматты @lubi.dom.osh баракчасынан көрүүгө болот.

Анын иши негизинен эркектер менен байланыштуу: эмерек чогултуучулар, усталар, жеткирүүчүлөр жана кызматкерлердин көбү эркектер. Бирок бул Гаухарга бардык процесстерди ишенимдүү башкарууга, команданын ишин уюштурууга жана бизнести алдыга жылдырууга тоскоол болбойт. Командасында ошондой эле сатууну жана маркетингди өнүктүрүүгө көмөктөшкөн менеджер жана маркетолог айымдар да иштешет.

Гаухар аялдар үчүн бизнес жүргүзүү, өзгөчө өлкөнүн түштүк аймагында, оңой эместигин айтат. Бул жерде чыдамкайлык, ишеним жана бекем мүнөз талап кылынат. Бирок дал ушул сапаттар ага кыйынчылыктарды жеңип, алдыга умтулууга жардам берет.

«Менин оюмча, бизнестеги аялдар көбүнчө жоопкерчиликтүү болушат. Бирок аялдарга кыйыныраак. Мунун баарына туруштук берүү үчүн күчтүү мүнөз керек», — дейт ал.

Гаухардын тарыхы — бул тажрыйба, эмгекчилдик жана жоопкерчиликти өзүнө ала билүү аялга өз бизнесин ийгиликтүү өнүктүрүүгө кандай жардам берерин көрсөткөн мисал. Ал соода тармагындагы кызматкерден баштап өзүнүн эмерек салонун ийгиликтүү башкарган ишкерге чейин өсүп жетти. Анын жолу бизнес акча менен гана эмес, бекем мүнөз, билим, сабырдуулук жана алдыга умтулуу менен куруларын далилдеп турат.

FINCA Банк үчүн Гаухардын баяны — мүмкүнчүлүктөрдү өз бизнесин өнүктүрүүгө туура пайдалана билген жоопкерчиликтүү жана максаттуу кардардын тарыхы. Анын жолу ишкерлерди өсүүнүн бардык баскычтарында колдоо канчалык маанилүү экенин көрсөтөт. Айрыкча кайрадан баштоодон коркпогон, жоопкерчиликти өзүнө алып, үй-бүлөсү, командасы жана кардарлары үчүн туруктуу бизнес түзгөн адамдарды колдоо өзгөчө мааниге ээ.