Амбициялуу башталыштан ири бизнеске чейин: ишкер айым Ботоканова Бурулдун ийгилик жолу

Бишкек шаарынын тургуну Ботоканова Бурул жаш кезинен эле тигүүчүлүккө кызыгып келген. Кооз кийимдерди жаратууга болгон сүйүүсү аны өзүнүн тигүү цехин ачууга шыктандырып, анда улуттук этно-кийимдерди тиге баштаган. Убакыттын өтүшү менен Бурул өз ишин тынымсыз өнүктүрүп, чеберчилигин өркүндөтүп, ассортиментин кеңейтип, бизнесине каражат эле эмес, жан дүйнөсүн да арнады.

Бурул үч баланын энеси. Үй-бүлөсү анын эң ишенимдүү тиреги болуп саналат. Жакындары анын демилгелерин ар дайым колдоп, ишине ишенип, мүмкүн болушунча жардам берип, бизнесинин өсүшүнө бекем негиз түзүп келишет.

Алгачкы этаптарда Бурул башка банктардан 100 миң жана 500 миң сом өлчөмүндө насыя алган. Бул каражаттар ательенин туруктуу иштешине жардам бергени менен, өндүрүштү кеңейтүүгө жана чоң пландарды ишке ашырууга жетишсиз болгон.

Ошол эле учурда Бурул өндүрүштү жаңыртып, заманбап жабдууларды сатып алып, ири заказдарды аткарууну дайыма кыялданчу. Досторунан FINCA Банкы аркылуу ишке ашырылып жаткан ЕРӨБдүн (ЕБРР) «Борбор Азиядагы бизнестеги аялдар» программасы тууралуу уккандан кийин, ал бул мүмкүнчүлүктү колдонуп, FINCA Айым бизнес-насыясына арыз берген.

Программанын алкагында Бурул FINCA Банкы аркылуу 60 ай мөөнөткө 2,5 миллион сом өлчөмүндө FINCA Айым насыясын алган. Бул каржылоо анын бизнесин өнүктүрүүдө чоң түрткү болду. Ал алынган каражаттын эсебинен өндүрүшүн кеңейтип, жабдууларын жаңылап, жаңы технологияларды киргизип, этно-кийимдердин ассортиментин кыйла көбөйттү.

Бүгүнкү күндө анын тигүү цехинде 15 тигүү машинасы иштеп, кызматкерлер чоң көлөмдөгү заказдарды кыска мөөнөттө аткарууга мүмкүнчүлүк алышты.

Бирок анын ийгилигинде каржылык колдоо гана эмес, ЕРӨБдүн «Борбор Азиядагы бизнестеги аялдар» программасына катышуусу да чоң роль ойноду. Бул программа Бурулга жаңы дем берип, өз күчүнө болгон ишенимин арттырып, ишкер аял катары өзүнө болгон ишенимин бекемдеди.

Бүгүнкү күндө Бурул улуттук салт менен заманбап стилди айкалыштырган өзгөчө этно-кийимдерди жаратып, ательесин жана тигүү цехин ийгиликтүү өнүктүрүүдө. Анын продукциясын дүңүнөн да, чекене да сатып алууга болот. Өзүнүн эмгегинин жыйынтыктарын жана чыгармачылыгын ал Instagram баракчасындагы 30 миңден ашуун катталуучусу менен бөлүшүп келет: @tumar_ethno.

Бурулдун окуясы — өжөрлүк, талант, үй-бүлөнүн колдоосу жана каржылык мүмкүнчүлүктөр аялдардын кыялдарын ишке ашырып, ийгиликтүү бизнеске айландырууга кандайча жардам береринин жаркын мисалы.